Бөлүмдөр
Жума, 19-июль
Ысык-Көл облусуЫсык-Көл району 13.10.2015 19:30

Кыргызстандагы кош бойлуу аялдардын саламаттыгы канааттандырарлык эмес, - дарыгер (фото)

Turmush -  Ысык-Көл облусунда эне менен баланын өлүмүн азайтуу маселесин талкуулаган семинарда айтылгандай кош бойлуу энелер өз ден соолугуна кайдыгер мамиле жасаган учурлар кездешүүдө.

Семинардын жүрүшүндө Бишкек шаарынан келген тажрыйбалуу адистер  аталган маселени алдын алуунун жолдору тууралуу кенен маалымат беришти.

Дарыгерлер белгилегендей, адамга күн сайын 100 микрограммга чейин йод талап кылынат. Анын 60%ы жашылча-жемиштен, 30%ы эт, сүт азыктарынан, 3%ы абадан, 3%ы суудан, калганы туз жана башка азыктардан алынат.

Семинарда белгилүү болгондой, өлкө боюнча кош бойлуу аялдардын саламаттыгы канааттандырарлык эмес. Буга энелердин өз ден соолугуна кош көңүл мамилеси, тиешелүү адистердин жетишсиздиги кедергисин тийгизүүдө.

Кош бойлуу аялдардын көпчүлүгү богок оорусуна чалдыгышат. Мындан улам тубаса оорулуу наристелер төрөлүүдө.

«Учурда богок оорусу өлкө боюнча кучагын кенен жайып жаткан кези. Андыктан жергиликтүү тургундар, өзгөчө кош бойлуу айымдар эндокринолог дарыгеринин кеңешин алуу керек», - деди Ысык-Көл облустук үй-бүлөлүк дарыгерлер тобунунун башкы эндокринологу Тамара Бакасова.

Ал кошумчалагандай, облустук дарыгерлердин демилгеси менен мындай семинарлар жыл сайын өткөрүлүп турат. Ар бир семинарда орчундуу оорулар каралып, илдетти алдын алуу багытында иштер аткарылат. Ал эми семинарга бардык дарыгерлердин катышууга мүмкүнчүлүгү бар.

Семинардын жүрүшүндө богок илдети жана онкологиялык оорулардын пайда болушу, дарылоо процесси жана аларды алдын алуу боюнча тасма көрсөтүлүп, маалыматтар берилди.

Кыргызстандагы бийик тоолуу климаттык-географиялык шарт йоддун азайышына себеп болот. Мындан улам ар бирибиз күнүмдүк тамактанууда пайдалуу азыктарды кошуубуз зарыл экендигин дарыгерлер эскертишти.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×