Бөлүмдөр
Бейшемби, 18-июль
Ысык-Көл облусуЫсык-Көл району 23.11.2016 09:17

Ысык-Көлдө өспүрүмдөрдүн эмгегин пайдаланган жетекчилерге административдик жаза көрүлдү

Turmush -  Ысык-Көл районунда кафелерди, соода түйүндөрдү текшерүү учурунда жаш өспүрүмдөрдүн эмгегин пайдалануу фактылары аныкталган. Бул тууралуу райондук прокуратурадан маалымдашты.

Маалыматка караганда, Чолпон-Ата шаарынын «Платиниум» кафесинде ушул жылдын май айынан бери 2001-жылы туулган Р.Е. аттуу 15 жаштагы өспүрүм кыз иштеп келгени аныкталды. Кафенин жетекчилиги ал кыз менен эмгек келишимин түзгөн эмес. Ал медициналык кароодон өткөндүгү тууралуу санитардык китепчеси, документтери жок иштеп жүргөн. Өспүрүм кызды күндүзгү саат 10:00дөн 22:00гө чейин иштетишкен.

Ошондой эле, жаш өспүрүмдүн эмгегин пайдалануу фактысы Чолпон-Ата шаарындагы «У рыбака» кафесин текшерүү учурунда аныкталган. Аталган кафеде Т.Э. аттуу 17 жаштагы кыз иштегендиги белгилүү болгон. Ал дагы кафенин жетекчилиги менен эмгек келишимин түзгөн эмес.

КРнын Эмгек кодексинин 91-беренесине ылайык жумушчулардын айрыкча категорияларына кыскартылган жумуш күнүнүн узактыгы каралган. Алсак, жашы жете элек 14 жаштан 16 жашка чейинки жарандарга жумасына 16 сааттан көп эмес, 16 жаштан 18 жашка чейинки өспүрүмдөргө жумасына 24 сааттан көп эмес иштөө каралган.

«Жумуш берүүчү эмгек келишимин 14 жаштан өткөн гана өспүрүм менен ата-эненин уруксаты менен жазуу жүзүндө түзүшү керек. Жогорудагы фактылар боюнча Эмгек кодексин бузуп, жаш өспүрүмдөрдү жумушка тарткан мекемелердин жетекчилери административдик жаза алышты», - деп маалымдайт прокуратура.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×