Бөлүмдөр
Шаршемби, 21-август
Ысык-Көл облусуЫсык-Көл району 18.06.2018 09:28 На русском

Айыл турмушу: 9 жылдан бери аары баккан ысык-көлдүк үй-бүлө бир сезондо 900 миң сом киреше табат (фото)

Turmush -  Ысык-Көл районунун тургуну Агата Тятькова үй-бүлөсү менен аары багып, бир сезондо 3 тоннага чейин бал алышат. Аны менен аймактык кабарчы таанышты.

А.Тятькованын үй-бүлөсү балды бир ай мурун сатыкка чыгарып баштаган. Алар аарынын 57 үй-бүлөсү багылган бал челектер менен Григорьев капчыгайына чыгышат.

«Тоолордо бөрү карагат гүлдөгөн учурда дароо ал жерге чыгып, биринчи болуп бөрү карагат балын алабыз. Андан кийин бал челектерди таалага жеткиребиз. Алынган балды идиштерге салып, сатуу пункттарында сатыкка коебуз. Бул жерге келген туристтер биздин негизги кардар болуп эсептелинет», - деди Агата.

Аарыларды багууга Агатага үч уулу жана кызы жардам берет. «Бул иш көп эмгекти талап кылат. Ар бир аарыны көзөмөлдөп, таарынтпоо керек. Кышында да аларга кам көрүү зарыл. Бал алганга чейин көптөгөн баскычтарды басып өтөбүз. Балдын бир нече түрүн сатыкка коебуз. Анын бир килограммы сезонго жана жалпы коюлган баага жараша 250 сомдон баштап 300 сомго чейин бааланат», - деди ал.

Анын үй-бүлөсү 9 жылдан бери аары багып, бал алат. Жубайлардын айтымында, эгер балды экспорттоо мүмкүнчүлүгү болсо, бал челектердин санын көбөйтүшмөк.

«Ысык-Көлдүн таза балы болсо абдан бааланат. Биз аарылардын үй-бүлөсүн көбөйтө алабыз, бирок алынган балды сатууда маселе жаралышы мүмкүн. Биздин өлкө башка мамлекеттерге эшигин ача элек. Ошондуктан 2-3 тонна балды облустун аймагында гана сатабыз. Албетте, эл аралык рынокко чыгып, мындай даамдуу балды Россия, Казакстан жана башка өлкөлөргө саткыбыз келет. Бирок азырынча мүмкүнчүлүк жок», - деди ал.

Агатанын үй-бүлөсү бир сезондо 3 тонна баллдын килограммын 300 сомдон сатса, алардын кирешеси 900 миң сомго чейин жетет.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×