Бөлүмдөр
Дүйшөмбү, 19-август
Ысык-Көл облусуЫсык-Көл району 19.07.2019 11:35

Бостериде жоголгон 3 жаштагы баланы ата-энесине өткөрүп беришти

Turmush -  Чолпон-Ата шаарындагы жана Бостери айылындагы пляждарда 15-июлдан 19-июлга чейин 10 жашка чейинки 3 бала жоголуп кеткен. Бул тууралуу ОИИБдин басма сөз кызматы билдирди.

Алардын жоголушуна ата-энелердин көзөмөлдөбөгөнү себеп болгон.

«Ысык-Көлдүн жээгинде эс алуучулар көп болууда. Милиционерлер ата-энелерден балдарды дайыма көзөмөлдөөнү өтүнүп жатышат. 17-июлда кечинде пансионаттардын биринин кызматкерлери Бостери айылында жайгашкан милициянын аймактык пунктуна адашып кеткен 3 жаштагы баланы алып келишкен.

Кызматкерлердин айтымында, бала катуу чочуп калган. Ошол учурда милиция кызматкерлери көчмө унаа менен бардык пансионаттарды кыдырып, эки сааттан кийин ата-энесин табышкан. Жоголгон баланын 37 жаштагы энеси Бостери айылындагы пансионатка жакын жайгашкан соода түйүндөрдүн биринде иштейт. Ата-энеси баласын таппай калышкан», - деп айтылат маалыматта.

Чолпон-Ата шаарында 18-июлда 3 жаштагы З.Ильгиз аттуу бала табылган. Ысык-Көл РИИБдин инспекторлору унаалар өтүп жаткан жолго улам чуркап чыгып жаткан 3 жаштагы баланы көрүшкөн. Бир нече убакыттан кийин ата-энесин таап, аларга өткөрүп беришкен. Алар Сары-Ой айылынын тургундары болушкан.

Ата-энеси түшкө маал уктап жатканда 3 жаштагы бала үйдөн чыгып, негизги жолго чейин жеткен.

Милиция кызматкерлери эс алуучуларды мас абалда сууга түшпөөгө, коопсуздук эрежелерин сактоого, ата-энелерден балдарды дайыма көзөмөлдөп турууга үндөйт.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×